Emeli aň ulgamynda işleýän öňdebaryjy kompaniýalar okuw maglumatlaryny döretmek üçin teatr we improwizasiýa aktýorlaryny işe çekip başladylar. Bu materiallar adamyň duýgularyny tanap bilýän we olary ýerine ýetirip bilýän modelleri kämilleşdirmek üçin ulanylýar.
Bu ugurda esasy potratçylaryň biri Handshake AI kompaniýasydyr, ol esasanam OpenAI-ni maglumat bilen üpjün edýär.
Bildirişlerde aktýorlara tölegli onlaýn seanslaryň hödürlenýändigi aýdylýar. Onda gatnaşyjylar öňünden berlen sahnalary we emosional ýagdaýlary janlandyrýarlar. Bu usul duýgularyň döreýşi, üýtgeýşi hakda nusga edinmek, şeýle-de dürli äheňleri ýygnamak üçin zerurdyr. Mundan ozal ulanylan adaty tekst maglumatlary arkaly şeýle inçe aýratynlyklary almak örän kyn bolupdy.
Kompaniýalar häzirki zaman dil modelleriniň çylşyrymly tehnik meseleleri çözüp bilseler-de, adaty durmuş ýagdaýlarynda ýa-da duýgy bilen bagly meselelerde ýalňyşlyk goýberýändiklerini belleýärler. Bu kemçilikleri aradan aýyrmak üçin bolsa maglumatlaryň täze görnüşleri we ýörite bellikler gerek.
Handshake AI, Mercor we Scale AI ýaly kompaniýalar öz hyzmatdaşlar toruny giňeldýärler. Işe diňe bir aktýorlar däl, eýsem dürli ugruň hünärmenleri – hukukçylar, lukmanlar we ssenariýaçylar hem çekilýär. The Verge neşiriniň maglumatyna görä, soňky bir ýylda şeýle hyzmatlara bolan isleg birnäçe esse artdy. Şunlukda Handshake AI kompaniýasynyň 2025-nji ýylyň noýabryndaky dolanyşygy 150 million dollara ýetdi.
Dogrusy, aktýorlaryň şeýle taslamalara gatnaşmagyň awtomatlaşdyrmak ulgamyny çaltlaşdyryp, döredijilik we aň zähmetine degişli kärlerde iş orunlarynyň azalmagyna getirip biljeginden gorkýanlary-da az däl.
Ýöne muňa garamazdan, kompaniýalar modellerini kämilleşdirmek üçin maglumatlaryň möçberini artdyrmagyny dowam etdirýärler.
