Lexus kompaniýasy Hytaýyň bazarynda täze nesil ES sedany üçin sargytlary kabul edip başlady. Häzirki wagtda alyjylara diňe gibrid görnüşindäki ES300h modeli hödürlenýär.
Esasy komplektasiýanyň bahasy 309 müň ýuandan (46 350 dollar) başlanýar.
Goşmaça hökmünde iki sany opsiýa toplumy elýeterlidir: 12 000 ýuanlyk (1 800 dollar) "Comfort Passenger Package" we 30 000 ýuanlyk (4 500 dollar) "Multi-Sense Pure Enjoyment Package". Geljekde bu hatarda doly elektrik görnüş hem peýda bolar, şol bir wagtda öňki ES200 modeli hem parallel görnüşde satuwda galar.
Täze model daşky görnüşi we salonyň dizaýny boýunça öňki nesillerden tapawutlanýar. Onuň ölçegleri 5140 × 1920 × 1555 mm, teker bazasy bolsa 2950 mm düzýär. Awtoulaga 18 dýuýmlyk teker diskalary oturdylypdyr.
Awtoulag 14 dýuýmlyk ekrany bolan mediaulgam bilen enjamlaşdyrylan, meňzeş displeý öňdäki ýolagçy üçin hem elýeterlidir. Käbir fiziki düwmeler sanly dolandyryş bilen çalşyryldy. Enjamlaryň hataryna öňdäki oturgyçlaryň ýyladylyşy we wentilýasiýasy, ruluň elektrik sazlamasy we ýyladylyşy, proýeksion displeý, yzky günüň şöhlelerinden goraýan perdeler, simsiz zarýad beriji, "Mark Levinson" audiosistemasy, L2 derejeli sürüjä kömek ulgamlary we lýuk girýär.
Gibrid gurluşy 152 at güýjüne eýe bolan 2,0 litrlik hereketlendiriji esasynda gurlupdyr. Elektromotor 113 at güýjüni berýär, ulgamyň umumy kuwwaty bolsa 197 at güýjüne deňdir. Geçiriji guty hökmünde elektromehaniki e-CVT wariatory ulanylýar.
