ABŞ-da häzirki prezident Donald Trampyň şekili ýerleşdirilen ýadygärlik tylla teňňesini çykarmak baradaky karar tassyklanyldy. Bu barada ABŞ-nyň Inçe sungatlar komissiýasyna salgylanýan RIA Nowosti habar berýär.
Edaranyň wekiliniň maglumatyna görä, agzalary öň Ak tamyň ýolbaşçysy tarapyndan tassyklanan federal komissiýa paneli 24 karatlyk altyn teňňäniň dizaýnyny biragyzdan goldady we penşenbe güni degişli karar kabul edildi.
Kabul edilen taslamada görkezilişi ýaly, tylla teňňäniň öň tarapynda Trampyň Ak tamdaky Owal kabinetinde ýumrugy düwülgi, stola söýenip duran görnüşi şekillendiriler. Şeýle-de teňňäniň ýüzüne «Azatlyk» («Liberty») sözi we ABŞ-nyň garaşsyzlygynyň 250 ýyllygyny aňladýan 1776–2026 ýyl seneleri, aşaky böleginde bolsa ABŞ-nyň milli şygary bolan «Biz Hudaýa ynanýarys» («In God We Trust») diýen ýazgy ýazylar.
Altyn şaýlygyň arka tarapynda ýurduň esasy nyşanlarynyň biri bolan ak kelleli bürgüdiň şekili ýerleşdiriler.
