Türkmenistanyň ilçihanasy 17-nji martda açylan XXXIII Minsk halkara kitap sergi-ýarmarkasynda milli pawilýonyny tanyşdyrdy. Bu barada Orient habarlar agentligi habar berýär.
Şu ýyl bu forum Belarusyň paýtagtynyň administratiw toplumynda geçirilýär we oňa 23 ýurtdan 500-e golaý gatnaşyjy ýygnandy. Çäräniň esasy mowzuklarynyň biri Garaşsyz Döwletleriň Arkalaşygynyň (GDA) döredilmeginiň 35 ýyllygy boldy. Diplomatik wekilhanalar tarapyndan taýýarlanan milli pawilýonlar gelýän myhmanlara dürli ýurtlaryň edebiýaty we medeniýeti bilen tanyşmaga mümkinçilik berýär.
Türkmen diwarlygynyň esasyny Halk Maslahatynyň Başlygy Gurbanguly Berdimuhamedowyň we Prezident Serdar Berdimuhamedowyň eserleri düzdi. Şeýle hem ýurduň Garaşsyzlygynyň 35 ýyllygyna we 2026-njy ýylyň şygaryna bagyşlanan neşirler görkezildi. Türkmen nusgawy şahyrlarynyň daşary ýurt dillerine terjime edilen eserleri pawilýonda aýratyn orun aldy.
Diwarlygy elde dokalan halylar we milli nagyşly lybaslar has-da baýlaşdyrdy. Sergä gelýänler kitaplar, döwürleýin neşirler bilen tanşyp, ýurduň döwrebap binalaryny we medeni mirasyny görkezýän fotosuratlara syn edip biler.
Sergi 22-nji marta çenli dowam eder.
