Dünýäniň iň tanymal, şol bir wagtyň özünde-de nätanyş köçe suratkeşi Benksiniň hakyky adynyň Dewid Jonsdygy anyklandy. Şeýle netijä Reuters agentliginiň žurnalistleri geçiren derňewleriniň netijesinde geldi.
Benksiniň şahsyýetini anyklamak boýunça ilkinji synanyşyk 2008-nji ýylda edilipdi. Şonda «Mail on Sunday» gazeti ony asly Bristoldan bolan Robin Ganningem diýip atlandyrypdy. Bu neşirden soň suratkeşiň resminamalary üýtgedi we indi onuň pasportynda Beýik Britaniýada has giňden ýaýran Dewid Jons ady peýda boldy.
Derňew işiniň dowamynda Reuters-iň wekilleri Benksiniň ýakyn töweregindäki 10-dan gowrak adam bilen söhbetdeş boldy, emma olaryň hiç biri suratkeşiň şahsyýetini ne tassyklady, ne-de inkär etdi. Täze ady anyklamaga açyk resminamalar, şol sanda graffiti ussadynyň işi bilen baglanyşykly öňki bugalteriň hasabatlary kömek etdi. Agentlik bu maglumatlaryň gizlinligi sebäpli resminamalary çap etmeýär.
Žurnalistler Benksiniň döredijiliginde anonimligiň (nätänyş bolup galmagyň) örän möhümdigini, emma onuň şahsyýetiniň mälim edilmeginiň jemgyýetçilik üçin uly ähmiýete eýedigini nygtaýar. Suratkeşiň töweregindäki käbir adamlar maglumatlary äşgär etmezlik barada ylalaşyga gol çekdi, beýlekiler bolsa oňa bolan hormaty sebäpli dymýar. Adamlaryň ady aýtmazlygynyň ýene bir sebäbi — onuň işleriniň hakykylygyny barlaýan we täze eserlerini ilkinji bolup kime satmalydygyny çözýän abraýly «Pest Control Office» kompaniýasyndan gelip biljek täsirlerden gorkmagydyr. Şeýle hem, suratkeşiň aklawçysy anonimligi ýitirmegiň müşderisi üçin howpludygyny, sebäbi onuň öz döredijiligi üçin ýyllarboýy haýbatlara sezewar bolup gelýändigini öňe sürdi.
