British Wildlife Photography Awards baýragynyň guramaçylary Beýik Britaniýanyň tebigatyna bagyşlanan, her ýyl geçirilýän BWPA-2026 bäsleşiginiň ýeňijilerini we baýrakly orunlara mynasyp bolanlary yglan etdiler.
Bu ýyl bäsleşige 12 müňden gowrak surat gelip gowuşdy.
Suratlar 11 ugur boýunça seljerildi, olaryň her biri haýwanlaryň özüni alyp barşyndan başlap, tokaý ekoulgamlaryna çenli ýabany tebigatyň dürli taraplaryny şöhlelendirýär.
Baş baýragy bu ýyl Pol Hobson aldy. Onuň tapawutlanan suraty üstesine “Ak-gara surat” ugry boýunça birinji orny eýeledi.
Surat Şeffilddäki kölüň düýbünden düşürilipdir. Onda suwuň ýüzünde ýüzüp ýören gurbaga surata alnypdyr. Adaty bolmadyk rakurs özboluşly wizual täsiri döredýär we tanyş haýwany başga bir nukdaýnazardan görkezýär.
Beýleki ugurlar boýunça ýeňijiler:
“Haýwanlaryň özüni alyp barşy” - "Nemezida", Mark Parker
“Ýaş britan suratçysy” – “Guw etenesi”, Ben Lukas
“Haýwanlaryň portretleri” – “Ör boýuna”, Alaster Marş
“Britaniýanyň botanikasy” - Barri Webb, “Miksomisetler we suw damjasy"
“Kenarýaka we deňiz” - “Parlap ýalbyraýan”, Jeýms Laýnott
“Ýaşaýyş gurşawy” – “Suw serçesiniň arzuwy”, Mark Hamfri
“Gizlin Britaniýa” – “Täze Durmuş”, Julian Terreros-Martin
“Şäheriň ýabany tebigaty” – “Rul başynda irkilen”, Saýmon Waýtman
“11 ýaşa çenli ýaş suratçy” – “Iň gowy görnüş”, Jeými Smart
"12-14 ýaşly ýaş suratçy" – “Akrobatyň güýmenjesi”, Jek Krokford
Bäsleşigiň ýolbaşçysy Will Nikolsyň bellemegine görä: “Bu ýylky ýeňijiler hakykatdanam Britaniýanyň haýwanat dünýäsiniň täsinligini, köpdürlüligini we häsiýetini görkezýär. Tanyş görnüşlerden seýrek we garaşylmadyk pursatlara çenli - bu suratlar suratçylaryň ussatlygyny we hyjuwyny şekillendirýär”.
Guramaçylar indi 2027-nji ýylyň bäsleşigine gatnaşmak üçin arzalary kabul edişligiň başlandygyny yglan etdiler.
