Niderlandlaryň Zýutfen şäheriniň ýaşaýjysy Şarlotta Maýer öz öýünden meşhur suratkeş Rembrandtyň goly bilen döredilen 35 sany asyl nusgadaky grawýurany tapdy. ArtNews neşiriniň habar bermegine görä, bu eserler dürli wagtlarda onuň atasy tarapyndan satyn alnypdyr.
Zenan bu tapyndyny COVID-19 pandemiýasy döwründe, öýüni tertibe salyp ýören wagty ýüze çykardy. Ol tahyllaryň birinden atasynyň haçandyr bir wagtlar satyn alan grawýuralaryndan ybarat bukjany tapdy. Eserleriň hakykylygyny anyklamak üçin Amsterdamdaky Rembrandtyň öý-muzeýiniň hünärmenlerine ýüz tutan Maýer geçirilen barlaglaryň we seljerme işleriniň netijesinde eserleriň 35-siniň hem hakykatdan-da Rembrandta degişlidigini bildi.
Şarlottanyň aýtmagyna görä, onuň atasy bu işleri takmynan 1900-1920-nji ýyllar aralygynda satyn alypdyr. Şol döwürler grafika eserleriniň häzirki ýaly gymmaty bolmansoň, olary aýap saklajagam bolman, tahyla oklap goýberipdirler.
Tapylan grawýuralaryň bir bölegini Şarlottanyň şahsy kolleksiýasyndaky beýleki eserler bilen bilelikde şäher muzeýinde sergilemek meýilleşdirilýär. Onuň ýygyndysynda diňe bir Rembrandtyň däl, eýsem onuň halypalarynyň, döwürdeşleriniň we şägirtleriniň işleri-de bar.
Maýer tapylan eserleriň häzirki wagtda bazardaky nyrhy hakynda dil ýarmady.
