«Mersedes» toparynyň britaniýaly sürüjisi Jorj Rassel «Formula-1» awtoýaryşlary boýunça dünýä çempionatynyň ilkinji tapgyry bolan Awstraliýanyň Gran-prisiniň ýeňijisi boldy.
Ikinji orny onuň topardaşy, italiýaly Andrea Kimi Antonelli eýeledi. Üçünji bolup pellehana «Ferrari» toparynyň wekili Şarl Lekler geldi.
Dünýäniň ýedi gezekki çempiony, «Ferraride» çykyş edýän britaniýaly Lýuis Hemilton ýaryşy münberden bir ädim yzda tamamlady. «Formula-1-iň» häzirki çempiony, «Maklaren» toparynyň sürüjisi britaniýaly Lando Norris bäşinji orny eýeledi. «Red Bull» toparynyň sürüjisi, niderlandly Maks Werstappen saýlama ýaryşynda bolan heläkçilikden soň 20-nji orundan başlap, ýaryşy altynjy bolup tamamlady.
Ýaryşa gatnaşan 22 sürüjiniň 17-si pellehana ýetmegi başardy. Iki sürüji bolsa starta çykyp bilmedi. «Maklaren» toparyndan awstraliýaly Oskar Piastri ýaryşyň başlanýan ýerine barýan ýolda heläkçilige uçrady. «Audi» toparyndan germaniýaly Niko Hýulkenberg bolsa tehniki meseleler sebäpli ýaryşa gatnaşyp bilmedi.
Çempionatyň indiki ýaryşy 13–15-nji mart aralygynda Hytaýda geçiriler.
