Mercedes-Benz kompaniýasy kaşaň sedanyň çäkli mukdardaky görnüşini — Mercedes-Maybach S 680 V12 Edition modelini hödürledi. Bu awtomobil taryhy Maybach Zeppelin modeline hormat hökmünde döredildi we dünýä bazary üçin bary-ýogy 50 nusgada öndüriler.
Awtomobilleriň bir bölegi Ýaponiýa iberiler, ol ýerde diňe bäş sany ulagy satmak meýilleşdirilýär. Sanynyň juda çäkli bolmagy sebäpli, öndüriji satyn almak hukugyny lotereýa arkaly paýlap biler.
Ulagyň kuzowy iki reňkli görnüşde boldy: ýokarky bölegi «Manufaktur Olive», aşaky bölegi bolsa «Obsidian Black» öwüşgininde ýerine ýetirildi. Kuzow kümüşsöw bezeg çyzyklary we Maybach-yň 20 dýuýmlyk tigirleri bilen bezeldi. Her bir ulagy reňklemek üçin on gün diýen ýaly wagt sarp edilýär — bu adaty modelleri reňklemekden iki esse köp wagtdyr. Şeýle-de, bezeg işlerinde 24 karatlyk altyndan bölekler ulanylýar.
Awtomobiliň salony «Manufaktur Saddle Brown» we «Black» reňkli iki öwüşginli Nappa derisi bilen bezeldi. Kelle goýulýan ýerlerde altyn reňkli Maybach nyşanlary ýerleşdirildi. Şeýle-de, salonyň içinde awtomobiliň hususy belgisi goýlan ýörite tagtajyk oturdyldy.
Model 621 at güýjüne we 900 Nm aýlanma güýjüne eýe bolan, goşa turbinaly 6 litrlik V12 hereketlendirijisi bilen enjamlaşdyryldy. Ulagyň 97 km/s çenli bat almagy üçin 4,3 sekunt töweregi wagt gerek.
Awtomobiliň bahasy, takmynan, 53,99 million ýenadan — takmynan, 343 müň dollardan başlanýar.
