Hyundai kompaniýasy awtoulaglardaky nawigasiýa kartalaryny ýüklemek ulgamyny döwrebaplaşdyrýar. Indi "Connected Car Navigation Cockpit" (ccNC) multimedia platformasy bolan awtoulaglar täzelenmeleri has çalt we awtomatiki usulda, sürüjiniň hiç hili gatnaşmagy gerekmezden alyp bilerler.
Mundan ozal sürüjiler täze kartalary diler merkezine barmazdan, özbaşdak gurnap bilýärdiler. Munuň üçin faýllar Hyundai-nyň resmi saýtyndan göçürilip, USB-göterijiler ýa-da SD-kartalar arkaly awtoulaga geçirilýärdi. 2022-nji ýyldan başlap bolsa kompaniýa täzelenmeleri "howa arkaly" (OTA) ornaşdyryp başlady. Bu funksiýany ilkinji bolup Hyundai Ioniq 5 modeli aldy, soňra bolsa ol beýleki awtoulaglara hem ýaýradyldy.
Ýakyn wagta çenli täzelenmeler seýrek çykýardy we diňe uly göwrümli programma üpjünçilik paketleri bilen bilelikde ýaýradylýardy.
Täze girizilýän ulgam bolsa has ykjam maglumat bukjalaryny ulanar. Bu bolsa ýüklemek üçin sarp edilýän wagty ep-esli gysgaldar we täzelenmeleri has ýygy-ýygydan çykarmaga mümkinçilik berer. Kartalar, hatda, awtoulag hereket edip barýan wagtynda hem täzelenip biler. Şol pursatda fon reźiminde diňe zerur bolan ýol bölekleri ýüklener we täze maglumatlar awtoulag indiki gezek otlananda işläp başlar.
Ýewropada bu funksiýa 2026-njy ýylyň martyndan başlap elýeterli bolar. Ol ccNC ulgamy we aýda 9,99 ýewro bahasy bolan "Bluelink Pro" ýazylyşygy bar bolan müşderiler üçin işlär.
