Journal of Cosmology and Astroparticle Physics ylmy žurnalynda giňişligiň we wagtyň dürli sebitlerini birleşdirýän matematiki gurluşlar — Eýnşteýn-Rozen köprüleriniň täzeçe düşündirişini hödürleýän barlag çap edildi. Işiň awtorlary şeýle köprüleriň adaty wagt akymy bilen onuň ters ugruny baglanyşdyrýan «wagt aýnalary» hökmünde hyzmat edip biljekdigini düşündirýärler.
Eýnşteýn-Rozen köprüleri 1935-nji ýylda umumy görälik teoriýasyny we kwant mehanikasyny sazlaşdyrmak üçin teklip edilipdi. Owal başda syýahat etmek usuly hökmünde garalmadyk bu usul filmlerde we kitaplarda «gurçuk deşikleri» ady bilen meşhurdyr.
Täze geçirilen barlag bolsa başlangyç pikire gaýdyp gelýär we onuň üstüni wagtyň tersine akýan ugrunyň barlygy hakyndaky çaklama bilen doldurýar.
Barlagda Stiwen Hoking tarapyndan 1970-nji ýyllarda öňe sürlen gara deşiklerdäki maglumat gapma-garşylygyna aýratyn üns berilýär. Awtorlaryň gipotezasyna görä, wakalaryň gözýetiminden aňryk düşýän maglumatlar ýitip gitmän, eýsem wagtyň ters ugruna düşüp, hereketini dowam edýär. Bu bolsa täze teoriýalary girizmezden, kwant mehanikasynyň ýörelgelerini saklap galmaga mümkinçilik berýär.
Şeýle-de, bu modeliň älem derejesindäki netijelerine-de seredilýär. Hususan-da, Uly partlamanyň öňki gysylyp barýan Älemiň yza tarap atylmagynyň netijesi bolup biljekdigi we bu tapgyryň yzlarynyň kosmosyň mikrotolkunly täsirindäki asimmetriýalarda görnüp biljekdigi çaklanylýar.
