Hyundai Elantra sedanynyň sekizinji nesli 2027-nji ýylyň başynda bazara çykmaga taýýarlanýar. Bu model öz segmentinde iň ýokary tehnologiýaly we estetiki taýdan kämil awtomobilleriň biri bolmaga dalaş edýär. Ulagyň suratlaryny Carscoops neşiri paýlaşdy.
Dizaýnerler ýedinji nesildäki ýiti burçly keşpden we diagonal çyzyklardan ýüz öwrüp, has arassa we futuristik görnüşe üns berdi: awtomobiliň öň tarapyny kuzowyň doly giňligine uzaýan kese yşyk paneli bezär, esasy faralar bolsa insiz radiator gözenegine ýerleşdiriler.
Awtomobiliň profili hem yzky C sütüniň üýtgeşik formasy netijesinde üýtgär, gapdal aýna «ýüzýän» görnüşe eýe bolar. Yzky tarapda bagažlygyň giňliginde inçe yşyk zolagy bolar. Şeýle-de, awtomobil öňki neslinden has göwrümli bolar. Onuň uzynlygy 4765 mm çenli ulalar, bu bolsa öňküden 55 mm uzyndyr. Awtomobiliň ini 1855 mm, tigir bazasy 2750 mm çenli artar. Netijede, bu ýolagçylar üçin has rahat giňişligi üpjün eder.
Awtomobiliň içinde Android Automotive-iň esasynda işleýän PLEOS Connect ulgamy we Gleo AI ses kömekçisi arkaly hakyky sanly rewolýusiýa bolar. Esasy ekran ulaldylar we panelde merkezi orny eýelär, ýanynda bolsa inçe sanly enjam paneli ýerleşdiriler. Şol bir wagtyň özünde, esasy funksiýalar we howany dolandyryş ulgamy üçin fiziki düwmeler saklanyp galar.
Tehniki häsiýetnamalar hem täzelendi: alyjylara umumy kuwwaty 140 at güýjüne deň bolan gibrid hödürlener. Şeýle-de, 147 at güýjündäki 2,0 litrlik dört silindrli atmosfera hereketlendirijisiniň we 200 at güýjüni berýän 1,6 litrlik turbomotoryň bolmagyna garaşylýar. Mundan başga-da, 300 at güýjünden gowrak kuwwaty bolan 2,5 litrlik turbomotorly aýratyn Elantra N sport wersiýasy taýýarlanýar. Emma tutuş hatar indi diňe döwrebap 8 basgançakly awtomatik guty bilen enjamlaşdyrylyp bilner.
Resmi premýeranyň ýakyn aýlarda bolmagyna garaşylýar. Täze awtomobil Toyota Corolla, Mazda3, Honda Civic we Nissan Sentra ýaly modeller bilen bäsleşip biler.
