2025-nji ýylyň netijeleri boýunça Huawei-iň girdejisi 127 milliard dollara ýetdi. Bu görkeziji kompaniýanyň 2020-nji ýyldaky, ýagny sanksiýalardan öňki derejesine laýyk gelýär diýip, South China Morning Post neşiri habar berýär.
ABŞ tarapyndan kompaniýa garşy girizilen çäklendirmeler 2019-njy ýyldan bäri dowam edýär.
Soňky bäş ýylyň içinde kompaniýa ilkinji gezek Hytaýyň smartfon bazarynda ýyly birinji orunda tamamlady. Huawei-iň bazardaky paýy 16,4% boldy. Ikinji orny bolsa 16,2% görkeziji bilen Apple eýeledi. Habarda bellenilişi ýaly, bu netijä diňe bir enjamlaryň satuwy däl, eýsem kompaniýanyň hususy programma ekoulgamynyň ösdürilmegi hem täsir etdi.
Huawei smartfon bazaryndan başga ugurlarda hem öz ornuny berkitdi. Kompaniýa emeli aň ulgamlaryny okatmak pudagynda esasy gatnaşyjylaryň birine öwrüldi. Habar berilmegine görä, Hytaýyň iň iri 43 sany dil modeli Huawei-iň Ascend seriýasynyň güýçlendirijilerinde okadyldy. Huawei-iň apparat platformasy 200-den gowrak açyk kodly emeli aň modelleri bilen utgaşykly işleýär.
Şeýlelikde, 2025-nji ýylda kompaniýa girdejisiniň artandygyny we bir wagtyň özünde birnäçe tehnologiki ugurlarda öz täsirini giňeldendigini hasaba aldy.
