Nýu-Ýorkdaky adatdan daşary güýçli ýagan gar hatda robotlaryň hem ellerine pil bermäge mejbur etdi.
Öň hem habar berşimiz ýaly, ABŞ-nyň demirgazyk-gündogaryna ýagan garyň galyňlygy 40-dan 90 santimetre çenli ýetdi, ulag ýollary ýapylyp, uçuş gatnawlary saklanyldy. Şunlukda galyň garyň döreden bökdençligi sebäpli Reflex Robotics kompaniýasy özüniň kömekçi robotlaryny gar arassalamak işlerine uýgunlaşdyrmak kararyna geldi. Inženerler robotyň Nýu-Ýorkdaky ştab-kwartirasynyň öňünde pil bilen gary nähili arassalaýandygyny we gary nädip we nirä üýşürmelidigine düşunýändigini görkezýän wideoşekilli pursatlary paýlaşdylar.
Reflex kompaniýasy durmuş üçin peýdaly robotlary döretmek bilen tanalýar. Mundan ozal olar agaç ussahanalarynda işleýän we ammarlarda harytlary gaplaýan robotlary hödürläpdiler.
Bu robotyň gurluşy tigirlerdäki hereketli binýatdan we esasa berkidilen göwreden ybaratdyr. Bu ulgam elleriň we datçikleriň dinamiki usulda ýokary-aşak süýşmegine mümkinçilik berýär. Şeýle gurluş enjamyň ýokary manýowrlylygyny we dürli belentlikdäki zatlara el ýetirip bilmegini üpjün edýär. Robot hatda darajyk ýerlerde-de özüniň ýokary derejedäki çalasynlygyny görkezip bilýär.
Tehnologiýalaryň ösmegi bilen Reflex roboty has özbaşdak bolup barýar. Ýakyn wagtda bu robot boýunça adamyň orny oňa diňe gözegçilik edip we käbir aýratyn ýagdaýlarda goşulmakdan aňry geçmez diýlip garaşylýar. Häzirki wagtda şeýle robotlaryň ikisine bir adamyň gözegçilik etmegi ýeterlikdir.
Robotyň tanyşdyrylyş dabarasy 2024-nji ýylda ABŞ-da geçirilen sergide bolupdy. Şonda ol tekjelerden harytlary özbaşdak alyp bilmegi bilen sergä gelenlerde uly täsir galdyrypdy.
