Boks äleminiň iň garaşylýan duşuşyklarynyň biri tassyklandy: ýaponiýaly meşhur boksçylar Naoýa «Monstr» Inoue we Dzýunto Nakatani ikinji iň ýeňil agram derejesinde dünýäniň absolýut çempiony diýen at ugrunda ringe çykarlar. Bu taryhy söweş 2-nji maýda Tokiodaky meşhur Tokyo Dome arenasynda geçiriler.
Bu duşuşykda Inoueniň eýelik edýän WBA, WBC, IBF, WBO we The Ring žurnalynyň çempionlyk guşaklary orta goýlar.
Iki pälwan hem bu duşuşyga şöhratly ýol bilen gelýärler: olaryň hersiniň hasabynda 32 ýeňiş bolup, entek hiç haçan ýeňlip görmediler. Häzirki guşaklaryň eýesi Inoue, agram derejesine bagly bolmazdan (P4P) dünýäniň iň gowy boksçylarynyň reýtinginde ikinji orny eýeleýär. Ol 32 ýeňşiniň 27-sini nokaut bilen gazandy. Bu söweş «Monstr» üçin soňky bir ýylyň içinde dördünji uly synag bolar.
Onuň bäsdeşi Dzýunto Nakatani hem ejiz pälwan däl — ol eýýäm üç dürli agram derejesinde dünýä çempiony bolmagy başardy. Hasabynda 24 nokaut bolan Nakatani, 2025-nji ýylyň ahyrynda ikinji iň ýeňil agram derejesine geçipdi. Bu söweş onuň täze agram derejesindäki ikinji synagy bolar.
