Türkmenistanyň ýaş tennisçileri Bahreýnde uly üstünlik gazandy

Bahreýniň paýtagty Manama şäherinde geçirilen 14 ýaşdan uly bolmadyk ýetginjekleriň arasynda tennis boýunça Günbatar we Merkezi Aziýa çempionatynda Türkmenistanyň ýaş tennisçi gyzlary ajaýyp netijeleri görkezdi. 13 döwletiň wekilleriniň gatnaşan ITF Asia 14&U Development Championships bäsleşiginde türkmen türgenleri ýekelikde we jübütleýin ýaryşlarda hormat münberiniň iň ýokarky basgançagyna iki gezek göterildi.
Aşgabat şäherindäki 87-nji orta mekdebiň 7-nji synp okuwçysy Näzli Hudaýgulyýewa ýekelikdäki ýaryşlarda iki hepdede ähli garşydaşlaryndan üstün çykyp, iki sany altyn medal eýeledi. Ol aýgytly duşuşyklarda Iordaniýanyň wekilini utmagy başardy.
Näzli jübütleýin ýaryşlarda hem Sülgün Işangulyýewa bilen bilelikde çykyş edip, ýene-de iki altyn medal gazandy. Türkmen jübüti iki hepdelik ýaryşlaryň dowamynda Liwanyň we Saud Arabystanynyň wekillerini utup, hormat münberiniň iň ýokarky basgançagyna göterildi.
Bu üstünlik Näzli Hudaýgulyýewa Aziýa çempionatynyň final tapgyryna gatnaşmaga hukuk berdi. Häzirki wagtda ol öz ýaş derejesinde Aziýa ýetginjekler görkezijisinde 9-njy orny eýeleýär.
ITF Asia 14&U Development Championships abraýly sebit ýaryşy bolup, ol Kamboja we Bahreýn saýlama tapgyrlaryny öz içine alýar. Iň ökde türgenler Aziýa çempionatynyň final tapgyrynda çykyş eder. Ýaryşlaryň netijeleri 2027-nji ýylyň «Wimbledon» we «Australian Open» ýetginjekler ýaryşlaryna gatnaşmak üçin hukuk gazanmaga mümkinçilik berer.