Islandiýa Ýewropa Bileleşigine girmek baradaky referendumy öň çaklanylyşy ýaly 2027-nji ýylda däl-de, eýýäm 2026-njy ýylda geçirmegiň mümkinçiliklerine seredýär. Bu barada çeşmelere salgylanyp, Politico neşiri habar berýär.
Neşiriň maglumatyna görä, eýýäm awgust aýynda ÝB-de agzalyk baradaky gepleşikleri täzeden başlamak baradaky soragy orta atmak meýilleşdirilýär. Islandiýanyň parlamenti (Alting) referendumyň senesini ýakyn hepdeleriň dowamynda yglan eder diýlip garaşylýar. Eger raýatlar «razy» diýip ses berse, ýurt Ýewropanyň düzümine beýleki dalaşgär döwletlerden ir goşulyp biler diýip, Politico-nyň çeşmelerinden biri belledi.
Neşiriň ýazyşy ýaly, Islandiýanyň häkimiýetleri «geosyyasy sarsgynlar döwründe» bu işi çaltlaşdyrmak kararyna geldi.
Islandiýa ÝB-e girmek baradaky arzany maliýe çökgünliginiň ýitileşip, ýurduň üç sany iri banky bankrot bolan döwründe — 2009-njy ýylda beripdi. Emma 2013-nji ýylyň ahyrynda gepleşikler doňduryldy, sebäbi ýurduň ykdysadyýeti çalt dikelip başlapdy. 2015-nji ýylda Reýkýawik özüne dalaşgär hökmünde garamazlygy sorady.
Islandiýa Demirgazyk Atlantikada, Demirgazyk polýar tegeleginiň günortasynda strategik taýdan möhüm orny eýeleýär. Emma 401–402 müň töweregi ilaty (2026-njy ýylyň başyndaky maglumatlara görä) bolan bu ýurduň hususy goşuny ýok, howpsuzlyk meselelerinde ol NATO-da agzalygyna we ABŞ bilen baglaşylan ikitaraplaýyn şertnama bil baglaýar.
Islandiýa 2026-njy ýylda ÝB-e girmek barada referendum geçirmegi meýilleşdirýär
- şu gün 17:02
- 611
