Focus Features kinokompaniýasy «Basgy» («Давление») atly harby dramanyň treýlerini hödürledi. Ilkinji görkezilişi 29-njy maýa meýilleşdirilen film dünýä prokatyna hem şol aýda çykar.
Taryhy filmiň sýužeti Ikinji jahan urşy döwründe antifaşistik goşunlaryň Normandiýa düşürilmeginden 72 sagat öňki wakalary öz içine alýar. Wakanyň merkezinde — soýuzdaş güýçleriň baş serkerdesi Duaýt D. Eýzenhauer we BBC-niň meteorology Jems Stegg durýar.
Eýzenhauer amatsyz howa şertleriniň iň uly harby-deňiz operasiýasynda bökdençlik döretmeginden howatyr edýär. Goşunlaryň düşürilmeli wagty soňa geçirilse — ol hakdaky maglumatlar nemes içalylarynyň ellerine düşmegi ahmal. Operasiýany başlamak baradaky gutarnykly karary Eýzenhauer kabul edýär. Ol örän agyr basyş we wagt ýetmezçiligi şertlerinde hereket etmäge mejbur bolýar.
Filmde baş rolda «Oskar» baýragynyň eýesi Brendan Freýzer çykyş edýär. Şeýle-de onuň bilen Endrýu Skott, Demien Lýuis, Kerri Kondon we Kris Messina dagylar hem surata düşdiler. Filmiň režissýory öň «Otel Mumbaý: Garşylyk» («Отель Мумбаи: Противостояние») lentasynyň üstünde işlän Entoni Marasdyr.
