Argentinada agramy 720 kilograma ýetýän äpet köke bişirildi

Argentinada 720 kilogram agramly däp bolan äpet alfahor kökesi taýýarlanyldy diýip, «La Capital S.A.» neşiri habar berýär. Konditerleriň kärdeşler arkalaşygy tarapyndan guralan bu çäre Mar-del-Plata şäheriniň esaslandyrylmagynyň 152 ýyllygyna bagyşlandy.
Bu süýjülik MAR muzeýinde görkezildi we şol ýerde täze rekord resmi taýdan hasaba alyndy. Ol geçen ýylky 640 kilogram görkezijiden ýokary boldy. Ýerli ussatlara bu äpet kökäni taýýarlamak üçin birnäçe gün gerek boldy. Resmi dabaradan soň, alfahor böleklere bölünip, muzeýe gelenlere mugt paýlanyldy. Guramaçylar bu çäräniň ýurduň möhüm syýahatçylyk we aşpezlik merkezi hasaplanýan şäheriň hünär däplerini goldamaga gönükdirilendigini belledi.
Kökäni dadyp görmek üçin müňlerçe ýerli ýaşaýjy we syýahatçy ýygnandy. Olar bu süýji tagamy datmak üçin uzyn nobata durdy. Şäheriň ýyllygyny baýram etmek dabarasy dürli medeni we göwnaçyjy çäreler bilen utgaşyp, şäherde baýramçylyk ruhuny döretdi.