Starlink hemra internetini ulanyjylaryň sany 10 mln adamdan geçdi

SpaceX kompaniýasynyň esaslandyryjysy we Tesla-nyň baş direktory Ilon Mask özüniň X sosial ulgamynda Starlink hyzmatyny ulanýanlaryň sanynyň 10 million adama ýetendigini habar berdi.
Milliarderiň aýtmagyna görä, häzirki wagtda Starlink-iň dünýäniň 160 ýurdunda we sebitinde 10 milliondan gowrak işjeň ulanyjysy bar. Mask bu ulgama ynam bildirýän ähli ulanyjylara öz minnetdarlygyny bildirdi.
Kompaniýanyň ulanyjylar bazasynyň ösüş depgini örän ýokarydyr. Çünki, Starlink 9 million görkezijiden geçen ýylyň dekabr aýynyň ahyrynda geçipdi. Şeýlelikde, ýene bir million ulanyjyny goşmak üçin kompaniýa iki aýdan hem az wagt sarp etdi. Bu bolsa Starlink-iň her gün ortaça 19 000-den gowrak täze müşderi gazanandygyny aňladýar.
2025-nji ýylyň dowamynda Starlink-iň auditoriýasy iki esse artyp, 9,2 million adama ýetdi we 35 sany täze ýurtda elýeterli boldy. Häzirki wagtda dünýädäki hemra internet trafiginiň 97%-i hut şu kompaniýanyň paýyna düşýär. Mysal üçin, Braziliýa 1 milliondan gowrak ulanyjysy bilen Starlink üçin dünýäde ikinji uly bazara öwrüldi.
Şu ýyl bolsa orbitada has kämilleşdirilen we uly Starlink V3 hemralary ýerleşdirilip başlanar. Olar ýerdäki ulanyjylar üçin gigabit tizlikli internet maglumat alyş-çalşygyny üpjün eder.