Spotify akym (streaming) hyzmaty kompaniýanyň öňdebaryjy inženerleriniň dekabr aýyndan bäri "bir setir hem kod ýazmandygyny" mälim etdi. TechCrunch neşiriniň habar bermegine görä, bu täze iş usuly arkaly 2025-nji ýylyň dowamynda platforma 50-den gowrak täze funksiýa we üýtgeşme girizildi.
Inženerler iş prosesini çaltlandyrmak üçin Honk atly içerki ulgamy ulanýarlar. Bu platforma generatiw emeli aňy, hususan-da, Claude Code modelini ulanyp, hakyky wagtda aralykdan kod taýýarlamaga we ony ulanmaga mümkinçilik berýär.
Spotify inženeri heniz ofise barman, ýoldaka mobil telefonyndaky Slack arkaly emeli aňa bir ýalňyşlygy düzetmegi ýa-da täze funksiýa goşmagy tabşyryp bilýär. Emeli aň işi tamamlaýar we inženeriň telefonyna programmanyň täze wersiýasyny iberýär. Inžener ofise barýança täze kod eýýäm taýýar bolýar we ony işçi wersiýa birleşdirip bilýär.
Spotify diňe bir taýýar modelleri ulanman, eýsem başga hiç bir platformada bolmadyk özboluşly maglumatlar toplumyny döredýändigini belledi.
"Bu maglumatlar toplumy beýleki täjirçilik hyzmatlary üçin elýeterli däl. Biz modellerimizi her gezek täzeden okadanymyzda, ulgamyň has-da kämilleşýändigini görýäris. Bu derejedäki maglumatlar binýady heniz dünýäde ýok" diýip, Spotify-da belleýärler.
Kompaniýa eýýäm EA esasly ulanyjynyň islegine görä awtomatiki döredilýän aýdym toplumlary, akylly gözleg we maslahat ulgamy, diňlenilýän kompozisiýa barada giňişleýin maglumat berýän bölüm ýaly hyzmatlary durmuşa geçirdi.
