Arheologlar Sinaý ýarymadasynyň günortasynda ýüzüne gadymyýetde ýüzüne suratlar çekilen we oýulyp şekiller galdyrylan gaýany tapdylar. Alymlaryň çaklamasyna görä, olaryň iň gadymylary takmynan 10 müň ýyl ozal döredilipdir diýip, Yeni Safak neşiri habar berýär.
Müsüriň Syýahatçylyk we gadymyýet baradaky ministrligi bu tapyndyny «açyk asmanyň astyndaky tebigy muzeý» diýip atlandyrdy.
Umm-Yrak belentliginiň gündogar eňňidinde, uzynlygy 100 metrden gowrak bolan gaýa erňeginde arheologlar haýwanlaryň şekillerini, aw sahnalaryny, ýaragly adamlary, şeýle hem arap we nabateý dillerindäki dürli nyşanlary we ýazgylary tapdylar. Suratlar dürli döwürlere — taryhdan öňki döwürlerden (10–5,5 müň ýyl ozal) başlap, has giçki eýýamlara degişlidir.
Seljerijiler bu açyşyň Sinaýda yzygiderli ýaşan siwilizasiýalar barada täze maglumatlary berýändigini belleýärler. Olaryň çaklamasyna görä, Umm-Yrak belentligi müňýyllyklaryň dowamynda dürli halklar üçin tomaşa nokady, ýygnanyşyk we dynç alynýan ýer hökmünde ulanylypdyr.
Bu tapyndy alymlara dürli taryhy döwürlerde Sinaý ýarymadasynda ýaşan adamlaryň durmuş ýörelgesine, awçylygyna we medeni tejribelerine has gowy düşünmäge mümkinçilik berýär.
