Warner Bros. kompaniýasy Netflix bilen arany üzse, ýitgini Paramount öz üstüne alar

Paramount kompaniýasy Warner Bros. Discovery-ny satyn almak boýunça täze şertleri hödürledi. Teklibe görä, Paramount kompaniýasy Warner Bros.-yň 82,7 milliard dollarlyk şertnamany bozan ýagdaýynda Netflix-e tölemeli boljak öwez tölegini öz üstüne almaga taýýar. Bu barada Reuters we The Wall Street Journal habar berýär.
Paýnamalaryň bahasy öňküligine — her biri üçin 30 dollar ýa-da jemi 108,4 milliard dollar möçberinde galsa-da, Paramount kompaniýasy Warner Bros. Discovery-nyň paýdarlary üçin «garaşma tölegini» goşdy. Eger geleşik 2027-nji ýylyň ýanwaryna çenli tamamlanmasa, şol seneden başlap paýdarlara her çärýekde paýnama başyna 25 sent tölener. WSJ-niň bellemegine görä, bu mukdar ýylda, takmynan, 650 million dollar nagt pul möçberine ýetip biler.
Şeýle-de, Paramount Skydance kompaniýasy ylalaşygyň bozulmagy netijesinde Warner Bros. Discovery-niň Netflix-e tölemeli boljak 2,8 milliard dollar möçberindäki tölegini doly maliýeleşdirmäge razy boldy. Paramount-yň baş direktory Dewid Ellison bu çäreleri şertnamanyň gymmatyna bolan ynamy we kadalaşdyryjy amallaryň aýdyňlygyny üpjün edýän «möhüm gowulandyrmalar» diýip atlandyrdy.
Bu şertnama dünýäniň iň gymmatly media aktiwlerini, şol sanda meşhur studiýalary, kontent ýygyndylaryny we «Tagtlaryň oýny», «Garri Potter» hem-de DC Comics älemi ýaly uly franşizalary satyn almak bilen baglanyşyklydyr.