Toyota meşhur Highlander modeliniň 2027-nji ýyl üçin niýetlenen täze neslini tanyşdyrdy. Bu gezek Toyota düýpli ädim ädip, Highlander-iň benzinli we gibrid wersiýalaryndan doly ýüz öwürdi we ony diňe elektrikli (BEV) model hökmünde hödürledi.
Ulag iki komplektasiýada — XLE we Limited görnüşlerinde hödürlener. Alyjylar öz islegine görä öň çekiji (FWD) ýa-da doly çekiji (AWD) ulgamlaryny saýlap bilerler.
Ulagyň başlangyç XLE FWD wersiýasy 77.0 kVt·s batareýa we 221 at güýjüne eýe bolup, bir gezekki zarýad bilen 462 km ýol geçip bilýär. Has kuwwatly bolan doly çekijili wersiýalar bolsa 338 at güýjüni öndürýär. Iň ýokary komplektasiýa model 95,8 kVt·s batareýa bilen enjamlaşdyrylyp, bir zarýad bilen 515 kilometre (320 mil) çenli aralygy bökdençsiz geçmäge ukyplydyr.
Täze Highlander döwrebap NACS zarýad porty bilen enjamlaşdyrylandyr, bu bolsa Tesla-nyň zarýad beriş stansiýalaryndan hem peýdalanmaga mümkinçilik berýär. Şeýle-de, ulagda V2L (Vehicle-to-Load) tehnologiýasy bar: munuň kömegi bilen ulagyň batareýasyndan dürli öý enjamlaryna tok berip bolýar. Batareýany 10%-den 80%-e çenli doldurmak üçin bolsa bary-ýogy 30 minut ýeterlikdir.
Täze Highlander Toyota-nyň modern "bZ" dizaýn dilini ulanýar. Ulagyň daşky görnüşi inçe LED faralary we has aerodinamik gurluşy bilen tapawutlanýar. Salonyň içinde 12,3 dýuýmlyk sanly gural paneli we äpet 14 dýuýmlyk multimedia ekrany ýerleşdirilipdir. Ulag 3 hatarly oturgyçlar bilen üpjün edilen bolup, ýük bölüminiň göwrümi eýýäm eplenen oturgyçlar bilen 1274 litre çenli ýetýär.
Ulag ABŞ-nyň Kentukki ştatyndaky Jorgetown zawodynda öndüriler. Önümçilik 2026-njy ýylyň ahyrynda başlar. Garaşylýan başlangyç baha takmynan 48 000 dollar töweregi bolar.
