JATO Dynamics analitik agentliginiň täze hasabatyna görä, Dacia Sandero hetçbegi 2025-nji ýylyň dowamynda Ýewropada iň köp satylan awtoulag hökmünde hasaba alyndy. Ýyl boýunça bu modelden jemi 238 500 sany satyldy.
Dacia Sandero sanawda birinji orny eýelese-de, onuň satuw möçberi 2024-nji ýyl bilen deňeşdirilende 11% azaldy. Bu awtoulag Renault-Nissan bileleşiginiň CMF-B LS platformasyna esaslanýar. Bu platformanyň täzeden işlenen görnüşi Russiýanyň täze Lada Iskra modelinde hem ulanylýar.
Ýewropa reýtinginde ikinji orny Renault Clio eýeledi. Bu modelden 229 300 sany satyldy, bu bolsa geçen ýyl bilen deňeşdirilende 6% köpdür. Ilkinji üçlügi Volkswagen T-Roc krossoweri jemleýär — 210 100 sany satyş (+4%).
Ondan soňky orunlarda Volkswagen Golf (194 500 sany) we Toyota Yaris Cross (190 000 sany) durýar.
Reýtingiň ilkinji onlugyna girýän beýleki modelleriň arasynda Volkswagen Tiguan aýratyn tapawutlandy. Ol satuw möçberini 17% artdyrmagy başardy. Şeýle hem sanawda Peugeot 208, Peugeot 2008, Dacia Duster, Opel Corsa ýaly modeller orun aldy.
