Škoda 2025-nji ýylda bir milliondan gowrak awtomobil çykardy

2025-nji ýylda Škoda Auto kompaniýasy bütin dünýäde 1 065 000 ulag öndürdi. Bu görkeziji geçen ýyl bilen deňeşdirilende 15% ýokary bolup, brendiň soňky alty ýylda iň gowy netijesi hasaplanýar.
Kompaniýanyň maglumatlaryna görä, Mlada-Boleslawdaky esasy zawod 605 600 sany ulag çykardy. Taýýar awtomobillerden başga-da, esasy önümçilik meýdançasynda Škoda we Volkswagen Group markalarynyň elektromobilleri hem-de gibrid ulaglary üçin 329 000-den gowrak batareýa ulgamlary ýygnaldy. Bu zawod konserniň düzüminde içinden ýandyrylýan hereketlendirijili we elektrik hereketlendirijili modelleri bir hatarda ýygnaýan ýeke-täk zawod bolmagynda galýar. Komponentleriň umumy önümçilik möçberini bir milliondan gowrak transmissiýa we 500 000 hereketlendiriji emele getirdi.
Elektrokar segmentinde ykjam Elroq krossowerleriniň önümçiligi 112 500 sany, Enyaq modelleri bolsa, takmynan, 77 000 sany boldy. Kwasinydaky zawod önümçiligini 301 500 awtomobile çenli artdyrdy. Hindistanda önümçilik möçberi iki esse ýokarlanyp, 73 800 ulaga ýetdi. Şeýle hem, Thanh Cong Group bilen bilelikde Wýetnamda täze önümçilik meýdançasy açyldy.
«Biz alty ýylyň içinde ilkinji gezek 1 000 000 sany öndürilen Škoda awtomobili görkezijisinden geçdik. Bu uly üstünlik we biziň önümçilik toparlarymyzyň agzybir işiniň netijesidir» – diýip, önümçilik we logistika boýunça dolandyryş agzasy Andreas Dik belledi.