Günorta Koreýada miras salgydy baýlary ýurtdan gitmäge mejbur edýär

Günorta Koreýa dünýä boýunça baý adamlaryň iň köp gidýän ýurtlarynyň hataryna girdi. Munuň beýle bolmagy ýurtda bölekleýin hereket edýän miras salgydy ulgamy bilen baglanyşdyrylýar.
Britaniýanyň Henley & Partners konsalting kompaniýasynyň seljermesine görä, geçen ýyl koreýaly millionerleriň ýurtdan gidenleriniň sany takmynan 2400 adam boldy. Bu görkeziji 2024-nji ýyl bilen deňeşdirilende iki esse köpdür.  South China Morning Post neşirinde munuň dünýäde Beýik Britaniýadan, Hytaýdan we Hindistandan soň dördünji uly görkezijidigini bellenilýär.
«Maýa akymynyň çaltlanmagy Koreýada 60%-e golaýlap barýan miras salgydynyň möçberiniň ýokarylygy sebäplidir» diýip, Koreýanyň Söwda-senagat palatasynyň (KCCI) wekili hem nygtaýar.
Milli parlament tarapyndan bu salgydyň möçberini azaltmak baradaky kanun taslamasynyň ara alnyp maslahatlaşylmagy togtadylandan soň, KCCI 2072-nji ýyla çenli miras salgydyndan gelýän girdejileriň 2024-nji ýyldaky 9,6 trillion won (takm. 6,5 milliard dollar) bilen deňeşdirilende 35,8 trillion wona (25 milliard dollar) çenli ýokarlanjakdygyny çaklaýar. Bu ösüş salgyt töleýjileriň sanynyň artmagyna, kanunçylykdaky üýtgetmeleriň gijikdirilmegine we ömür dowamlylygynyň uzamagyna esaslanýar.  
Şoňa görä parlament, iň bolmanda, iri kompaniýalaryň mirasçylarynyň salgydy 20 ýyla çenli möhlet bilen bölekleýin tölemeklerine rugsat berilmegini sorady. Häzirki wagtda beýle mümkinçilik diňe kiçi we orta kärhanalaryň mirasçylary üçin göz öňünde tutulan. Uly kompaniýa eýeleri bolsa salgydy 10 ýylyň dowamynda doly tölemäge borçly.