Türkmen hünärmenleriniň geçiren ylmy barlaglarynyň netijeleri ABŞ-nyň Nýu-Ýork şäherinde neşir edilýän «Annals of Rehabilitation and Regenerative Medicine» atly halkara ylmy žurnalynda çap edildi. Bu makalalar Türkmen döwlet bedenterbiýe we sport institutynyň «Olimp» ylmy-usulyýet merkeziniň alyp baran işleriniň netijeleri esasynda taýýarlandy.
Agzalan neşir dikeldiş, sport lukmançylygy we hereket işjeňliginiň netijeliligi ulgamyndaky döwrebap çemeleşmelere ýöriteleşendir. Žurnalyň redaksiýa geňeşiniň düzümine ABŞ-nyň, Russiýanyň, Awstraliýanyň, Germaniýanyň, Italiýanyň we beýleki ýurtlaryň öňdebaryjy bilermenleri girýär. Bu bolsa çap edilýän işleriň halkara syn standartlaryna doly laýyk gelmegini üpjün edýär.
«Olimp» merkeziniň ylmy-barlag işleri milli ýygyndy toparlaryň türgenlerini taýýarlamak ulgamyny kämilleşdirmäge gönükdirilendir. Alnan ylmy maglumatlar türgenleşik işlerini kämilleşdirmek boýunça maslahatlary işläp düzmekde esas bolup hyzmat edýär. Barlaglaryň netijeleri diňe bir Nýu-Ýorkuň neşirinde däl, eýsem, Google Scholar we E-Library ýaly halkara ylmy platformalarynda hem ýerleşdirilýär.
