Niderlandlaryň Dusburg şäherindäki Kümüş muzeýi näbelli kişiler tarapyndan talandy. Jenaýatçylar umumy bahasy on müňlerçe ýewro barabar bolan 300-den gowrak gymmatly kümüş eksponatlary ogurladylar.
Muzeýiň müdiriýetiniň başlygy Ernst Busweldiniň habar bermegine görä, ogurlyk gije bolup geçipdir. Jenaýatçylar binanyň gapylaryny döwüp girip, soňra duýduryş ulgamyny we wideogözegçilik kameralaryny hatardan çykarypdyrlar.
Ogurlanan ýygyndy 1700–1920-nji ýyllar aralygynda ýasalan kümüş önümlerinden ybaratdyr. Bu gymmatlyklar öň niderland asylzadalaryna degişli bolupdyr. Ýitirilen zatlaryň arasynda muzeýi esaslandyryjy Martin de Kleýn tarapyndan ýygnalan gorçisa gaplarynyň toplumy hem bar. Ogurlanan eksponatlaryň içinde iň ähmiýetlileriniň biri bolsa, ussat kümüşçi Marsel Blok tarapyndan ýasalan we Dusburg şäheriniň gerbi bilen bezelen çemçeli gorçisa gaby hasaplanýardy.
Dogrusy, şeýle häsiýetli waka Niderlandiýada birinji gezek bolanok. Mundan bir ýyl öň, 2025-nji ýylyň ýanwarynda Drente welaýatyndaky muzeýden gadymy daklara degişli bolan, bahasy 4 million ýewrodan geçýän altyndan ýasalan gymmatly eksponatlaryň toplumy hem ogurlanypdy.
Niderlandlaryň Kümüş muzeýi talandy
- düýn 22:40
- 1k+
