Toyota kompaniýasy Amerikan futboly boýunça çempionatyň finaly bolan Superboul (Super Bowl) wagtynda görkezmek üçin ýörite taýýarlanan 30 sekuntlyk mahabat wideosyny hödürledi. Wideo brendiň iň meşhur modelleriniň biri bolan RAV4 krossowerine bagyşlanýar.
Wideoda garry atanyň öz kiçijik agtygyny RAV4 awtoulagyna mündirişi görkezilýär. Aradan 30 ýyl geçensoň, eýýäm kemala gelen agtygy öz atasyny şol bir modelde alyp barýar. Bu wagtyň içinde kadrdaky awtoulag öz nesillerini — birinjiden altynjy nesline çenli üýtgedýär. Mahabatda esasy üns tehniki aýratynlyklara däl-de, eýsem adamlara we nesilleriň arasyndaky arabaglanyşyga gönükdirilipdir. Şonuň üçin hem wideonyň şygary: "Adamlar — biziň esasy çelgimiz" diýlip atlandyrylýar.
Mahabatyň režissýory Rodrigo Saawedradyr.
Superboul ABŞ-nyň sport we telewideniýe durmuşyndaky iň uly waka hasaplanýar. Göni ýaýlym köp millionlyk tomaşaçyny bir ýere jemleýär, şonuň üçin kompaniýalar däp bolşy ýaly, hut şu çäre üçin ýörite mahabat roliklerini we promo-aksiýalaryny taýýarlaýarlar. Emma muňa garamazdan, soňky ýyllarda awtoulag öndürijileriniň göni ýaýlym mahabatlaryna bolan gyzyklanmasy kem-kemden azalýar.
