Afrika Futbol Konfederasiýasy (CAF) Senegal bilen Marokkonyň ýygyndylarynyň arasynda Afrika Milletler Kubogynyň finalynda bolup geçen düzgün bozmalar boýunça temmilerini yglan etdi. Şol duşuşykda Senegal Marokkony goşmaça wagtda 1:0 hasabynda ýeňip, taryhynda ikinji gezek ýaryşyň ýeňijisi bolupdy.
Duşuşygyň ahyrynda, ikinji ýaryma goşulan goşmaça wagtda meýdançada uly dawa ýüze çykdy. Senegalyň baş tälimçisi Pap Týaw öz oýunçylarynyň geçiren golunyň hasaba alynmandygyna we Marokkonyň peýdasyna penalti urgusynyň bellenilmegine närazylyk hökmünde topary meýdançadan alyp gitdi. Soňra toparyň kapitany Sadio Mane oýunçylary meýdança gaýtaryp getirdi.
CAF-nyň kararyna görä, Pap Týaw sporta mahsus bolmadyk hereketleri, adalatly oýun ýörelgelerini bozandygy we futbolyň abraýyna zeper ýetirendigi üçin 5 oýunlyk diskwalifikasiýa edildi we 100 müň dollar jerime çekdi. Bu sanksiýalar diňe CAF-nyň çägindäki geçirilýän ýaryşlara degişli bolup, Dünýä çempionaty — 2026-nyň oýunlaryna täsir etmeýär. Iliman Ndiaýe we Ismaila Sarr eminlere garşy eden hereketleri üçin 2 oýunlyk diskwalifikasiýa aldylar. Senegal Futbol Federasiýasy janköýerleriň, oýunçylaryň we tälimçiler düzüminiň hereketleri, şeýle-de finalda alnan 5 sany sary duýduryş üçin jemi 615 müň dollar jerime tölemeli boldy.
Marokko berlen temmiler: Aşraf Hakimi senegally derwezeban Eduar Mendiniň süpürgijini (polotensasyny) meýdançanyň daşyna zyňandygy (sporta mahsus bolmadyk hereket) üçin 2 oýunlyk (bir oýny şertli) diskwalifikasiýa edildi. Ismael Saibari ätiýaçdaky derwezebanyň Mendä şol süpürgijini bermegine päsgel bermäge synanyşandygy üçin 3 oýunlyk oýundan çetleşdirildi we 100 müň dollar jerime salyndy. Marokko Futbol Federasiýasy top alyp berýän çagalaryň özüni talabalaýyk alyp barmandygy, oýunçylaryň we tälimçileriň VAR zolagyna girip eminiň işine päsgel bermegi, şeýle-de janköýerleriň lazer ulanandygy üçin 315 müň dollar jerime aldy.
