«Barselona» Fermin Lopes bilen şertnama baglaşdy, ýöne Drony PSŽ-ä goýberdi

«Barselona» futbol klubunyň ýetişdiren oýunçysy Dro Fernandes PSŽ-niň oýunçysy boldy. Bu transfer barada parižli klubuň resmi saýty habar berdi. 
18 ýaşly ispaniýaly ýarymgoragçy 2030-njy ýyla çenli möhlet bilen şertnama baglaşdy. Ol Luis Enrikeniň baştutanlygyndaky täze toparynda 27-nji belgi bilen çykyş eder.
Fernandes «Barselonanyň» akademiýasynyň ähli tapgyrlaryny geçip, 2025-nji ýylda esasy toparda ilkinji gezek çykyş etdi. Ol şu möwsümde klub üçin bäş oýna gatnaşyp, bir assist etdi. Şeýle-de, oýunçy yzygiderli Ispaniýanyň ýaşlar ýygyndylarynda oýnamaga çagyryldy.

Şol bir wagtyň özünde, katalon klubunyň «La Masiýanyň» beýleki bir uçurymy — ýarymgoragçy Fermin Lopes bilen ylalaşyk gazanandygy mälim boldy. Žurnalist we insaýder Fabrisio Romanonyň maglumatyna görä, taraplar täze ylalaşygyň şertlerini makullapdyrlar. Futbolçynyň täze şertnamasy 2031-nji ýylyň tomsuna çenli hereket eder.
Habar berlişi ýaly, awgust aýynda Lopes «Barselonany» terk etmekden ýüz öwüripdir. Täze şertnama boýunça onuň zähmet haky iki esse artar. «La Vanguardia» neşiri futbolçynyň başga kluba geçmegi üçin bahasynyň hem iki esse ýokarlanjakdygyny belleýär. Bu bolsa toparyň Fermini saklap galmaga çynlakaý çemeleşýändigini görkezýär.

Klub şertnamanyň uzaldylandygy barada 30-njy ýanwara geçilýän gije «Kopengagen» bilen boljak Çempionlar ligasynyň duşuşygyndan soň resmi taýdan yglan etmegi meýilleşdirýär.
Fermin Lopes kluba 13 ýaşynda «Betisiň» akademiýasyndan geldi. Onuň häzirki şertnamasy 2029-njy ýylyň tomsuna çenli niýetlenendir. Häzirki dowam edýän möwsümde ýarymgoragçy toparyň düzüminde jemi 10 gol salyp, 10 assist etdi.
La Liganyň 19 tapgyryndan soň, «Barselona» 52 utuk bilen ýaryş jedwelinde birinji orny eýeleýär.