Amerikanyň Birleşen Ştatlaryna düşen güýçli gar boragany takmynan 200 million adama täsir etdi. Bu barada ABC amerikan teleýaýlymy habar berýär.
Milli meteorologiýa gullugynyň maglumatyna görä, güýçli gar ýagynlary Nýu-Meksiko ştatyndan başlap, ýurduň gündogaryndaky Täze Angliýa (New England) sebitine çenli ägirt uly meýdany gurşap aldy. Käbir ýerlerde garyň galyňlygy 40 santimetre ýetdi.
«PowerOutage» çeşmesiniň habar bermegine görä, 1 milliondan gowrak hojalyk toksuz galdy. Tebigy harasatdan, esasan, günorta ştatlar zyýan çekdi. «CNN» telekanalynyň habar bermegine görä, Tennessi ştatynda 330 müňden, Missisipide 160 müňden, Luizianada 135 müňden we Tehasda 90 müňden gowrak hojalyk elektrik energiýasyz galdy.
Ýaramaz howa şertleri sebäpli azyndan ýedi adam aradan çykdy. Luiziana ştatynda iki adam aşa sowuk urmagy sebäpli ýogaldy.
Garyň ýagmagy ulag ulgamynyň işini düýpli bökdedi. Geçen dynç günlerinde ABŞ-da 15 müňden gowrak awiareýsler ýatyryldy, birnäçe sebitlerde bolsa parom gatnawlary wagtlaýynça togtadyldy.
Häzirki wagtda ABŞ-nyň 23 ştatynda adatdan daşary ýagdaý tertibi girizildi. ABŞ-nyň Prezidenti Donald Tramp anna güni beren beýanatynda, gyssagly kömek gulluklarynyň garaşylýan rekord derejedäki aýazlara we täze gar boraganlaryna taýýardygyny mälim etdi.
