TCL täze hyzmatdaşlygyň çäklerinde Sony-nyň telewizor biznesini öz gözegçiligine alar

Sony we TCL kompaniýalary Sony korporasiýasynyň telewizor we hojalyk audio tehnikalaryny öndürmek boýunça biznesini dolandyrjak bilelikdäki kärhanany döretmek barada ylalaşdylar. Bu barada kompaniýalaryň umumy beýanatynda aýdylýar.
«Biz TCL bilen strategik hyzmatdaşlyk barada ylalaşyk gazananymyza begenýäris. Biziň iki kompaniýanyň birleşen tejribesi arkaly dünýädäki ähli müşderilerimize has täsirli audio we wideogörnişleri hödürlemek bilen, olaryň öýdäki dynç alyşlarynyň gymmatyny artdyrmak maksadymyz bar» diýip, Sony korporasiýasynyň prezidenti we baş ýerine ýetiriji direktory Kimio Maki belledi.
«Sony bilen baglaşylan bu strategik hyzmatdaşlygyň iki tarapyň hem güýçli taraplaryny birleşdirip, durnukly ösüş üçin kuwwatly platforma döretmäge ajaýyp mümkinçilik berjekdigine ynanýarys. Biznesiň biri-birini strategik taýdan doldurmagy, tehnologiýa we nou-hau alyş-çalyşlary, şeýle hem işewürlik integrasiýasy arkaly brendimiziň gymmatyny ýokarlandyrmaga, iş gerimini giňeltmäge we üpjünçilik zynjyryny kämilleşdirip, müşderilerimize iň ýokary hilli önümleri hem-de hyzmatlary hödürlemäge umyt baglaýarys» diýip, TCL Electronics Holdings Limited  kompaniýasynyň direktorlar geňeşiniň başlygy Du Huan sözüniň üstüni ýetirdi.
Ozal çap edilen maglumatlara görä, täze kärhananyň paýnamalarynyň 51 göterimi TCL kompaniýasyna degişli bolar, Sony bolsa 49 göterim paýyny saklap galar. Kompaniýalar özara düşünişmek baradaky memoranduma gol çekdiler we hökmany şertleri 2026-njy ýylyň mart aýynyň ahyryna çenli ylalaşmagy meýilleşdirýärler. Kärhananyň işine degişli edaralaryň rugsatlary alnandan soň, 2027-nji ýylyň aprel aýynda başlamagyna garaşylýar.
Bilelikdäki kärhana önümleri işläp düzmek, öndürmek, satmak we serwis hyzmatlary üçin jogapkär bolar. Telewizorlar öňki bolşy ýaly, Sony we Bravia markalary bilen çykarylmagyny dowam etdirer.