«Aktobe» futbol kluby Portugaliýanyň milli ýygyndysynyň we «Mançester Ýunaýtediň» öňki wingeri Luiş Nani bilen şertnama baglaşandygyny yglan etdi.
39 ýaşly futbolçy bilen baglaşylan ylalaşyk şu ýylyň ahyryna çenli niýetlenendir. Insaýder Iwan Karpowyň berýän maglumatyna görä, portugaliýaly futbolçynyň aýlyk zähmet haky 70 müň dollar bolar. Bellenilmegine görä, klubda ol oýnaýan menejer wezipesini ýerine ýetirer we kluby halkara derejesinde tanatmak bilen meşgullanar.
Ýakynda «Aktobe» kluby «Qazaq Stroy Properties» gurluşyk kompaniýasy tarapyndan 364 million teňňä satyn alyndy. Kompaniýanyň eýesi Nurlan Artykbaýew 228 million dollar baýlygy bilen Gazagystanyň Forbes sanawynda 44-nji ýerde durýar.
Nani 2024-nji ýylda professional karyerasyny tamamlapdy. Ol dürli ýyllarda «Sporting», «Mançester Ýunaýted», «Walensiýa», «Fenerbahçe», «Lasio», «Orlando Siti», «Wenesia», «Melburn Wiktori», «Adana Demirspor» we «Eştrela» ýaly klublarda oýnady.
«Mançester Ýunaýtediň» düzüminde Nani dört gezek Angliýanyň çempiony boldy, iki gezek Angliýanyň liga kubogyny gazandy, Çempionlar Ligasynda ýeňiji boldy, dört gezek Angliýanyň Superkubogyny we Klublaýyn dünýä çempionatyny utdy.
Portugaliýanyň milli ýygyndysy üçin ol 111 oýun geçirip, 24 gol geçirdi. 2016-njy ýylda Nani Ýewropanyň çempiony boldy.
