Toyota ýapon bazary üçin Hiace furgonynyň täzelenen görnüşini hödürledi. Onuň satuwy 2026-njy ýylyň 2-nji fewralynda başlar. Ýaponiýada modeliň häzirki nesli 2004-nji ýyldan bäri çykarylýar. Galan ýurtlarda Hiace-yň nesli 2019-njy ýylda üýtgedildi.
Täzelenme model üçin soňky on ýyldan gowrak wagtyň içinde iň ulusy boldy.
Ulagyň daşky görnüşinde üýtgeşmeler kän däl, diňe LED faralary döwrebaplaşdyryldy. Kuzow we rama öňküligine galdy. Soňky gezek furgonyň eksterýeri 2013-nji ýylda düýpli üýtgedilipdi, şol wagt başga bamper, radiator gözenegi we çyralar oturdyldy.
Bu gezek üýtgeşmeler, esasan, salona täsir etdi. Hiace-yň ähli wersiýalary nawigasiýa we töwerekleýin syn ediş bilen 8 dýuýmlyk sensor mediaulgamyny, şeýle-de 7 dýuýmlyk ekran bilen sanly enjam panelini aldy. Super GL wersiýasynda öňdäki oturgyçlary gyzdyrma ulgamy hödürlenýär. Esasy wersiýalarda indi yzky gapylary berkidiş funksiýasy bar.
Toyota Safety System howpsuzlyk ulgamlarynyň toplumy hem giňeldildi, öwrümlerde haýalladýan adaptiw dolandyryş, zolak çalyşmakda kömekçi, ýol nyşanlaryny tanamak ýaly funksiýalar hem-de çaknyşyklaryň öňüni almagyň kämilleşdirilen ulgamy peýda boldy.
Tehniki bölek öňküligine galdy – 158 at güýjüni berýän 2,0 litrlik benzin hereketlendirijisi we 149 at güýjüni berýän 2,8 litrlik dizel hereketlendirijisi, ikisi-de 6 basgançakly «awtomat» we yzky ýa-da doly herekete getiriji bilen bilelikde işleýär.
Furgon 18 müň dollardan 30 müň dollara çenli baha bilen dürli wersiýada hödürlenýär.
