Ford kompaniýasy Detroýt awtosalonynda meşhur Bronco modeliniň täze — RTR görnüşini tanyşdyrdy. Ýolsuz ýerlerde ýokary tizlikde sürmek üçin niýetlenen bu awtomobil has gymmat bahaly Bronco Raptor modeline has elýeterli alternatiwa hökmünde hödürlenilýär.
Tehniki aýratynlyklary we tapawudy:
- Hereketlendiriji: 418 at güýji bolan 3,0 litrlik V6 hereketlendirijili Raptordan tapawutlylykda, Bronco RTR 300 at güýjüne eýe bolan 2,3 litrlik dört silindrli turbo-hereketlendiriji bilen enjamlaşdyrylandyr.
- Agramyň paýlanyşy: Has ýeňil hereketlendiriji öň oka düşýän agramy azaldýar. Inženerleriň hasaplamalaryna görä, bu çylşyrymly ýolsuz ýerlerde ulagyň deňagramlylygyny we dolandyryşyny has-da gowulandyrýar.
- Tehnologiýa: Ulagda Raptordan alnan ýörite sowadyş ulgamy we turbonynyň işini çaltlandyrýan antilag ulgamy bar.
Dizaýn we enjamlaşdyryş: Bronco RTR standart görnüşde ýerden beýikligi ýokarlandyrylan asma ulgamy (podweska) we 33 dýuýmlyk tekerler bilen üpjün edilýär. Müşderiler goşmaça töleg arkaly Sasquatch bukjasyny satyn alyp bilerler. Bu bukja 35 dýuýmlyk äpet tekerleri we meşhur FOX amortizatorlaryny öz içine alýar. Ulagyň daşky keşbi täze diskler, kuzowdaky ýörite grafikalar we sarymtyl-ýaşyl (lime) reňkli bezeg elementleri bilen tapawutlanýar.
Bahasy we sargytlar: Bronco RTR-iň resmi bahasy heniz doly anyklanmady, emma bilermenler onuň 50 000 — 55 000 dollar aralygynda boljakdygyny çaglaýarlar. Deňeşdirme üçin: Bronco Raptor-yň bahasy takmynan 80 000 dollardan başlanýar.
Täze model üçin sargytlar şu ýylyň ahyryna çenli açylar.
