Nigeriýanyň milli ýygyndysynyň futbolçylary Marokkoda geçirilýän Afrika milletleriniň kubogynda üçünji ýer üçin oýunda Müsüriň toparyny penalti tapgyrynda utdy. Oýnuň esasy wagty golsuz tamamlandy – 0:0. Penalti tapgyrynda Nigeriýanyň topary güýçli geldi – 4:2. Müsürlilerden toparyň esasy ýyldyzlary Mohamed Salah we Omar Marmuş gol geçirip bilmedi.
Kubok üçin finalda Marokko bilen Senegalyň milli ýygyndylary göreşer. Oýun 19-njy ýanwara geçilýän gije bolar.
Nigeriýa öz taryhynda Afrikanyň kubogynda dokuzynjy gezek bürünç baýrak alýar. 2023-nji ýylda geçirilen ýaryşda topar finala çykyp, Kot-d’Iwuardan utulypdy.
