Şu ýyl Ispaniýanyň Superkubogyna gatnaşylandygy üçin berilýän pul baýraklary ýokary bolar. Patyşalyk ispan futbol konfederasiýasy (RFEF) ýaryşyň abraýyny ýokarlandyrmak we toparlary höweslendirmek üçin gaznany artdyrmak kararyna geldi.
2025-nji ýylda pul baýraklary üçin tas 19,65 mln ýewro bölünip berildi. «Barselona» we «Real» 6 mln ýewro, «Atletik» 2 mln ýewro, «Malýorka» bolsa 850 müň ýewro aldy. Mundan başga-da, ýarym finalçylar 1 mln ýewro, ýeňiji bolsa — «Barselona» — ýene 2 mln ýewro aldy.
Şu ýyl umumy gazna, takmynan, 23 mln ýewro bolar. Her topar titullaryna, klubuň taryhyna we teleauditoriýanyň meşhurlygyna görä öz paýyny alar.
RFEF-iň Superkubogy geçirmekden gazanýan girdejisiniň 51,9 mln ýewro derejesinde bolmagyna garaşylýar. Bu mukdardan, takmynan, 28 mln ýewro professional däl futboly ösdürmäge gönükdiriler.
Ýarym finallarda şu gije «Barselona» Bilbaodan «Atletik» bilen oýnar, ertir bolsa «Real» bilen «Atletiko» Madrid derbisinde duşuşar (iki oýun hem Aşgabat wagty bilen dogry ýarygije başlar). Final 11-nji ýanwarda bu duşuşyklaryň ýeňijileriniň arasynda bolar.
