"Barselonanyň" we Braziliýanyň milli ýygyndysynyň öňki ýyldyzy Dani Alwes Portugaliýanyň derejesi boýunça üçünji diwiziony bolan "Liga 3-de" çykyş edýän "San-Žuan-de-Wer" klubunyň şärikdeş eýesi boldy.
"Klubumyzyň taryhynda täze bir sahypa açylýar. Bu biziň üçin öwrülişikli pursatdyr. Alwes toparymyza ýeňiji ruhyýetini we uly maksatlary getirdi" diýlip, klubuň resmi beýanatynda bellenilýär.
"TyC Sports" neşiriniň habar bermegine görä, Alwes klubuň paýnamalarynyň 50%-ni satyn aldy we 2025/2026-njy ýyllaryň möwsüminiň ahyrynda paýlaryň galan bölegini hem satyn almak barada ylalaşyk gazandy. Şeýle hem, çeşmeler futbolçynyň diňe bir dolandyryşda däl, eýsem meýdançada-da kömek etmek üçin alty aýlyk şertnama baglaşmak mümkinçiligine seredýändigini habar berýärler. Emma şertnamanyň jikme-jiklikleri heniz doly mälim edilmedi.
Alwes karýerasynyň dowamynda Ispaniýanyň "Barselona" we "Sewilýa", Fransiýanyň "PSŽ", Italiýanyň "Ýuwentus", şeýle hem Braziliýanyň "Baýýa" we "San-Paulu" klublarynda oýnady. Ol soňky gezek 2023-nji ýylyň 8-nji ýanwarynda Meksikanyň "Pumas" toparynyň düzüminde meýdança çykypdy.
Braziliýaly goragçy dünýäniň iň köp titully futbolçylarynyň biridir — ol öz karýerasynda jemi 46 kubok gazandy. Alwes 6 gezek Ispaniýanyň, 2 gezek Fransiýanyň we 1 gezek Italiýanyň çempiony boldy. Şeýle hem ol 3 gezek Çempionlar ligasynyň, 2 gezek UEFA-nyň kubogynyň (Ýewropa ligasy) we 3 gezek UEFA-nyň Superkubogynyň ýeňijisi boldy. Braziliýanyň milli ýygyndysy bilen bolsa iki gezek Konfederasiýalar kubogyny (2009, 2013), iki gezek Amerikanyň kubogyny (2007, 2019) gazandy we 2021-nji ýylda Olimpiýa çempiony boldy.
