Aziýanyň futbol konfederasiýasy (AFK) AFK‑2 Çempionlar ligasynyň 1/8 final tapgyrynyň duşuşyklarynyň senelerini we başlanjak wagtlaryny tassyklady. Kuala‑Lumpurda geçirilen bije çekişligiň netijesine görä, «Arkadagyň» garşydaşy portugaliýaly futbol ýyldyzy Kriştianu Ronaldunyň çykyş edýän Saud Arabystanynyň «Al‑Nasr» topary bolar.
Ilkinji duşuşyk 11‑nji fewralda çarşenbe güni 10 müň tomaşaça niýetlenen «Arkadag» stadionynda geçiriler. Oýun Aşgabat wagty bilen 18:45‑de başlanar.
1/8 finalyň jogap duşuşygy 18‑nji fewralda çarşenbe güni Er‑Riýadda geçiriler. Oýun 23:15‑de başlanar.
«Al‑Nasr» AFK‑2 Çempionlar ligasynyň toparçalaýyn tapgyrynda «D» toparçasynda ähli 6 oýunda ýeňiş gazanyp, 22:2 gol tapawudy bilen birinji orny eýeledi. «Arkadag» bolsa bir ýeňiş, dört deňme‑deňlik we bir ýeňliş bilen «B» toparçasynda ikinji orna mynasyp boldy. Topar 6 oýunda 5 gol geçirdi, öz derwezesine bolsa 6 gol goýberdi.
Transfermarkt saýtynyň maglumatlaryna görä, «Al‑Nasryň» düzüminiň bazar bahasy 138,13 million ýewro diýlip bahalandyrylýar. «Arkadagyň» futbolçylarynyň umumy bahasy bolsa 2,83 million ýewro. Şeýlelikde, Saud Arabystanynyň toparynyň düzümi türkmen toparynyňkydan 49 esse diýen ýaly gymmatdyr.
«Al‑Nasr» toparynda 2023‑nji ýyldan bäri öz döwrüniň iň beýik futbolçylarynyň biri hasaplanýan, UEFA-nyň Çempionlar ligasynyň bäş gezek ýeňijisi, 2016-njy ýylyň Ýewropa çempiony, bäş gezek «Altyn top» baýragynyň eýesi 41 ýaşly Kriştianu Ronaldu çykyş edýär. Ol 2024‑nji ýylda resmi oýunlarda taryhda 900‑den gowrak gol geçiren ilkinji futbolçy boldy.
Ronaldudan başga-da, «Al‑Nasrda» dünýä futbolynyň beýleki ýyldyzlary hem çykyş edýär: portugaliýaly Žoau Feliks, senegally Sadio Mane, fransuz Kingsli Koman, horwatiýaly Marselo Brozowiç. Topary 71 ýaşly portugaliýaly hünärmen Žorže Žezuş tälim berýär.
«Arkadag» şu möwsümde AFK‑2 Çempionlar ligasynda eýýäm 430 müň dollar gazandy: toparçalaýyn tapgyra gatnaşandygy üçin 300 müň dollar, 1/8 finala çykanlygy üçin 80 müň dollar we toparçada gazanan ýeke-täk ýeňşi üçin 50 müň dollar gazandy. «Al‑Nasr» toparçalaýyn tapgyrda 6 ýeňiş gazanyp, 680 müň dollar baýrak aldy.
Çärýek finala çykan topar 160 müň dollar, ýarym finala çykan topar 240 müň dollar alar. Ýaryşyň final tapgyryna çykan klub 1 million dollar, çempion bolan klub bolsa 2,5 million dollar baýrak gazanar.
«Arkadag» – «Al‑Nasr» klublarynyň arasynda ýeňiji bolan klub çärýek finalda «Al‑Zawraa» (Yrak) – «Al‑Wasl» (BAE) klublarynyň arasyndaky ýeňiş gazanan topar bilen duşuşar.
