«Barselonanyň» polşaly hüjümçisi Robert Lewandowski 2022/23 möwsüminiň ahyrynda klubuň özünden gol geçirmezligi haýyş edendigini aýtdy. Bu barada ol Sport ispan gazeti bilen söhbetdeşlikde gürrüň berdi.
Ozal bu maglumaty polşaly žurnalist Sebastýan Staşewski futbolçy baradaky kitabynda neşir edipdi.
Hüjümçiniň aýtmagyna görä, haýyş klubdaky maliýe kynçylyklary bilen baglanyşyklydy.
«Men “Barselona” we ol ýerde işleýän adamlara uly hormat goýýaryn. Men klubdaky ýagdaýdan habarlydym. Klubuň bähbidine çözülmeli başga-da ýagdaýlar köpdi. Gysgaça aýdylanda, bu bonusdy we şol wagt “Barselonanyň” her bir ýewrony tygşytlaýandygy hemmelere mälimdi. Bu az pul däldi we meniň üçin bu hiç zady üýtgetmedi» — diýip, Lewandowski aýtdy.
Futbolçy bu haýyşyň oýnamaga päsgel bermändigini, ýöne gol geçirmelimi ýa-da geçirmeli däl diýip hemişe pikir edendigini belledi.
Şol wagta çenli «Barselona» Ispaniýada möhletinden ir çempionlygy gazanypdy, Lewandowski bolsa 23 gol bilen iň gowy bombardirleriň sanawynda birinji orny eýeledi. Şertnamanyň şertlerine görä, 25 gola ýeten ýagdaýynda klub hüjümçä birnäçe million ýewro bonus tölemelidi.
