Meşhur fransiýaly aktrisa, aýdymçy, fotomodel we ýazyjy Brižit Bardo 91 ýaşynda aradan çykdy. Bu barada onuň esaslandyran haýwanlary goramak gaznasyna salgylanyp, AFP agentligi habar berdi.
Ýaşlykda Brižit Bardo balet bilen meşgullandy. 1952-nji ýylda kinoda düşüp başlady, ýöne 1956-njy ýylda «Ýaratdy Hudaý zenany» filmi çykandan soň uly meşhurlyk gazandy. Şol wagta çenli onuň filmografiýasynda eýýäm 15 töweregi film bardy. Karýerasynyň dowamynda aktrisa tas 50 filme gatnaşdy. Iň belli filmleriň arasynda «Ýazgarma», «Babetta urşa barýar», «Hakykat», «Wiwa, Mariýa!» we «Parižli» bar. 1970-nji ýyllaryň başynda Brižit Bardo aktýorlyk karýerasyny tamamlaýandygyny yglan etdi.
Kinodan başga-da, ol aýdym-saz bilen işjeň meşgullanyp, onlarça aýdym ýazdy. Olaryň käbiri Serž Gensbur we Saşa Distel bilen bilelikde döredildi. 60 ýaşdan soň bolsa Brižit Bardo birnäçe kitap hem ýazdy.
1970-nji ýyllaryň ikinji ýarymyndan Brižit Bardo özüni haýwanlaryň hukuklarynyň goragyna bagyş edip, haýyr-sahawat «Brižit Bardo gaznasyny» esaslandyrdy.
Fransiýanyň Prezidenti Emmanuel Makron aktrisanyň aradan çykmagyna gynanç bildirip, ony XX asyryň legendasy diýip atlandyrdy.
