ABŞ-a inen güýçli boragan howa gatnawlarynyň işinde uly bökdençligiň ýüze çykmagyna getirdi. Tutuş ýurt boýunça, şeýle-de Kanadanyň (Toronto, Monreal, Wankuwer) howa menzillerinde gatnawlar ýatyryldy we gijikdirildi. Ýagdaý Nýu-Ýorkda we demirgazyk-gündogar ştatlarda has agyr boldy.
FlightAware portalynyň maglumatlaryna görä, 26-njy we 27-nji dekabrda ýaramaz howa sebäpli 16 müňden gowrak içerki we halkara awiagatnaw ýatyryldy we gijikdirildi.
Ýatyrylan we gijikdirilen gatnawlaryň aglabasy ABŞ-nyň JetBlue, Delta Airlines we Republic ýaly uly awiakompaniýalarynyň paýyna düşdi. 27-nji dekabrda JetBlue 162 gatnawy (16%) ýatyrdy we 122 gatnawy (12%) gijikdirdi. Delta Airlines 126 gatnawy (4%) ýatyrdy we 280 sanysyny (8%) gijikdirdi. Republic 78 gatnawy (7%) ýatyrdy we 38-isini (3%) gijikdirdi.
The New York Times Nýu-Ýorkuň käbir ýerlerinde gar örtüginiň 23 sm, şäheriň merkezinde bolsa 6 sm ýetendigini habar berýär.
Gatnawlaryň kabul edilmeginde we iberilmeginde has uly bökdençlikler Nýu-Ýorkuň üç howa menzilinde – La-Guardiýada, Jon Kennedi adyndaky halkara howa menzilinde we Nýuarkda hasaba alyndy.
Bökdençlikler iň işjeň syýahat döwri bolan Roždestwo möwsümine gabat geldi. Bloomberg borany La-Ninýa hadysasynyň gaýdyp gelmegi bilen baglanyşdyrýar.
