Mercedes-Benz kompaniýasy dizel hereketlendirijileriniň zyýanly zyňyndylary baradaky maglumatlaryň galplaşdyrylmagy boýunça derňewi tamamlamak üçin ABŞ-nyň häkimiýetleri bilen 149,6 million dollarlyk ylalaşyk baglaşdy. Reuters agentliginiň habar bermegine görä, ylalaşygyň çäginde awtoöndüriji 40 müňe golaý awtoulagy abatlamagy ýa-da yzyna satyn almagy öz üstüne aldy.
Tölegleriň umumy möçberi iki bölege bölünýär. Esasy jerime 120 million dollara deňdir. Galan 29,6 million dollar bolsa wagtlaýyn ätiýaçlyk hökmünde saklanýar: kompaniýanyň ekologiýa kadalaryna laýyk getiren ýa-da utilizasiýa üçin yzyna satyn alan her bir ulagy üçin bu mukdar 750 dollar azalar. Mundan başga-da, zyňyndylary azaltmak üçin abatlaýyş işleri geçirilen ulaglaryň eýeleriniň hersine 2000 dollar töleg berler.
Bu kazyýet işi synaglar wagtynda hapalanma derejesini emeli usulda pes görkezýän programma üpjünçiliginiň ulanylmagy bilen baglanyşyklydyr. Hakykatda bolsa, ýollarda ulanylanda zyýanly gazlaryň mukdary bellenen kadadan 30-40 esse ýokary bolupdyr.
Konserniň wekilleri bu çykdajylaryň ýyllyk maliýe netijelerine düýpli täsir etmejekdigini bildirdiler. Mundan ozal, 2020-nji ýylda Mercedes-Benz 250 müň awtoulag bilen baglanyşykly meňzeş şikaýatlar boýunça 2,2 milliard dollar töläpdi. Häzirki wagtda başga-da birnäçe ýurtda bu mesele boýunça kazyýet işleri dowam edýär.
