Türkmenistanyň "Ahal" futbol kluby AFK-2 Çempionlar ligasynyň toparçalaýyn tapgyryndaky çykyşyny Iordaniýanyň "Al-Husseýin" toparyna garşy myhmançylykda geçiren duşuşygy bilen tamamlady. 23-nji dekabrda Ammanyň Halkara stadionynda geçirilen oýun 3:1 hasabynda ýerli toparyň peýdasyna tamamlandy.
Oýnuň 53-nji minutynda türkmen toparynyň kapitany Elman Tagaýew hasaby açdy. Emma köp wagt geçmänkä, ýer eýeleri oýnuň gidişini öz peýdalaryna üýtgetmegi başardylar: 65-nji minutda Ýusef Abu Jalbuş hasaby deňledi, soňra bolsa Abdulla Al-Fahuri 74-nji we 80-nji minutlarda iki gol girizip, dubl etdi.
Geçirilen dört oýnuň netijesi boýunça "Ahal" bir utuk toplap, "C" toparçasynda üçünji orny eýeledi. Ýatlap geçsek, ilkinji tapgyrda türkmen futbolçylary Hindistanyň "Mohun Bagan" toparyny ýeňipdiler (1:0), emma Aziýa Futbol Konfederasiýasy soňra bu netijeni ýatyrdy. Sebäbi hindi kluby Eýranyň "Sepahan" toparyna garşy oýna gelmändikleri üçin ýaryşdan çykaryldy.
Toparçalaýyn tapgyryň çäginde "Ahal", şeýle hem öz meýdançasynda "Al-Husseýinden" (1:4) ýeňildi we Ysfahanyň "Sepahany" bilen iki gezek duşuşdy. Birinji bäsleşikde türkmen topary 0:1 hasabynda utuldy, ikinji oýun bolsa 2:2 hasabynda deňme-deň tamamlandy.
Toparçada 9 utuk toplan "Al-Husseýin" birinji orny eýeledi. 8 utugy bolan "Sepahan" bolsa ikinji ýeri eýeläp, pleý-off tapgyryna ýollanma aldy.
Şu gün şeýle hem "B" toparçasynda çykyş edýän "Arkadag" futbol klubunyň ykbaly çözüler.
Toparçalaýyn tapgyryň iň soňky duşuşygynda Türkmenistanyň çempiony öz meýdançasynda Bahreýniň "Al-Haldiýa" toparyny kabul edýär. Oýun sagat 21:00-da başlanar.
Soňky oýunlaryň öňüsyrasynda "B" toparçasyndaky ýagdaý örän dartgynly: "Arkadag" häzirki wagtda 5 oýundan soň 4 utuk bilen 4-nji ýerde barýar. "Al-Haldiýa" 6 utuk bilen ikinji, "Al-Ahli" 7 utuk bilen birinji, "Andižan" bolsa 5 utuk bilen üçünji ýerde ýerleşýär.
Şonuň üçin hem şu günki oýun "Arkadag" üçin aýgytly bolar. Turnir jedwelindäki utuklaryň aratapawudynyň azdygyny göz öňünde tutsak, şu günki ýeňiş türkmen klubuna "Al-Haldiýadan" öňe geçmäge we indiki tapgyra çykmak üçin mümkinçiliklerini ep-esli ýokarlandyrmaga ýol açar. Islendik başga netije, uly ähtimallyk bilen, topary pleý-offdan daşda galdyrar.
