Germaniýaly 33 ýaşly aerokosmos inženeri Mihaela Benthaus maýyp arabasynda kosmosda bolup gören ilkinji adam hökmünde taryha girdi. Uçuş Blue Origin kompaniýasynyň New Shepard suborbital kapsulasynda amala aşyryldy diýip, CNN habar berýär.
Apparat kosmosyň şertli serhedi hasaplanýan Karman çyzygyndan geçdi.
Bortda Benthaus bilen birlikde ýene bäş adam, şol sanda SpaceX-iň öňki ýokary wezipeli ýolbaşçysy Hans Kýonigsmann hem bardy. Ol bu missiýanyň guralmagyna ýardam berdi we Blue Origin bilen bilelikde oňa hemaýatkärlik etdi. Kosmos syýahatynyň takyk bahasy mälim edilmedi.
Kapsula 105 kilometrden gowrak belentlige galdy. Tutuş uçuş takmynan on minut dowam etdi. Gatnaşyjylar agramsyzlyk (newesomost) şertlerinde kosmos gämisiniň içinde erkin hereket edip bildiler. Benthausyň aýtmagyna görä, ol uçuşyň dowamynda hemişe gülüpdir we mikrograwitasiýada başaşak öwrülmäge synanyşypdyr.
Blue Origin kompaniýasy mundan öň hem suborbital missiýalara hereketi çäkli, görüş we eşidiş ukyby pes bolan adamlary gatnaşdyrypdy. Mundan başga-da, kompaniýanyň kosmos gämilerinde ýaşy 90-dan geçen syýahatçylar hem kosmosa uçupdylar.
