FIFA-nyň geňeşi Dohadaky mejlisde 2026-njy ýylyň dünýä çempionaty üçin býujeti tassyklady. Gurama ýaryşa gatnaşýan agza assosiasiýalaryň arasynda 727 mln dollar paýlamagy meýilleşdirýär. Bu mukdar Katardaky dünýä çempionatynyň görkezijisinden 50% ýokarydyr.
Baýrak gaznasynyň özi 655 mln dollar bolar.
Guramanyň maglumatlaryna görä, dünýä çempionatynyň ýeňijisi 50 mln dollar alar. Finalçylar 33 mln dollar, bürünç baýragyň eýesi 29 mln dollar, dördünji orny eýelän milli ýygyndy bolsa 27 mln dollar alar.
Dörtden bir finalçylara 19 mln dollar, 1/8 finala gatnaşyjylara 15 mln dollar, 1/16 finala çykan toparlara 11 mln dollar tölener. Toparçadan çykyp bilmedik toparlar 9 mln dollar alar. Mundan başga-da, kwalifikasiýadan geçen her bir topar taýýarlyk çykdajylaryny ýapmak üçin 1,5 mln dollar alar.
Býujetiň ösüşi ýaryşa gatnaşyjylaryň 48 topara çenli artdyrylmagy we oýunlaryň umumy sanynyň 104-e ýetmegi bilen baglanyşyklydyr. Ýaryş 2026-njy ýylyň 11-nji iýunyndan 19-njy iýuly aralygynda ABŞ-nyň, Kanadanyň we Meksikanyň stadionlarynda geçiriler. Açylyş oýny Mehikodaky «Asteka» stadionynda bolar. Final oýnuny Nýu-Jersi amerikan ştatyndaky «Metlaýf Stedium» meýdançasy kabul eder. Üçünji ýer üçin oýun Maýamide bolar.
