Marşall Adalary umumymilli esasy girdeji maksatnamasyny işe girizdi – ýurduň her bir ýaşaýjysy her çärýekde 200 dollar alar diýip, The Guardian habar berýär. Neşir ýurduň şeýle maksatnamany girizen dünýäde ilkinji döwletdigini belleýär.
Tölegler hiç hili şertsiz her bir ýaşaýja degişlidir. Marşall Adalarynyň ýaşaýjylary olary adaty walýutada ýa-da ABŞ dollaryna baglanan steýblkoin görnüşinde alyp biler. Pullary bank hasabyna geçirip, çek ýa-da sanly gapjyk arkaly alyp bolýar.
«Biz, hökümet, hiç kimiň ünssüz galmazlygyny üpjün etmek isleýäris. Çärýekde adam başyna 200 dollar ýa-da ýylda 800 dollar sizi işden çykmaga mejbur etmez, ýöne ahlak goldawy bolar» diýip, ýurduň maliýe ministri Dewid Pol The Guardian bilen söhbetdeşlikde belledi. Onuň aýtmagyna görä, ilkinji tölegler noýabryň ahyrynda geçirildi.
Bu başlangyç bahalaryň ýokarlanýan we ýaşaýjylaryň ýurtdan gidýän döwründe ilatyň sosial goragyny üpjün etmäge gönükdirilýär. Taslama 1,3 mlrd ABŞ dollaryna barabar ýörite gaznadan maliýeleşdirilýär. Bu serişdeler arhipelagda ýadro synaglarynyň netijeleri üçin öwez tölegini göz öňünde tutýan Amerikanyň Birleşen Ştatlary bilen şertnamanyň çäklerinde bölünip berildi. Waşington 2027-nji ýylyň ahyryna çenli ýene 500 mln dollar maýa goýmaly.
Maliýe menejeri Aneli Sarana ýurduň köp ýaşaýjylarynyň alnan puly şol bada azyk we beýleki zerur zatlary satyn almak ýaly esasy zerurlyklaryny kanagatlandyrmak üçin sarp edendigini aýtdy.
Marşall Adalary ABŞ bilen baglanyşygy bolan Ýuwaş umman döwletidir. 42 müň töweregi ilaty bolan ýurt Gawaý bilen Awstraliýanyň arasyndaky arhipelagda ýerleşýär. Numbeo saýtynyň maglumatlaryna görä, bu ýerde salgytlar tölenenden soň ortaça zähmet haky, takmynan, bir ýarym müň dollara barabar.
