Amerikanyň Chevrolet awtoulag kompaniýasy ABŞ-nyň 250 ýyllygy mynasybetli çäkli mukdardaky (limited edition) Corvette Stars&Steel seriýasyny tanyşdyrdy. Ýubileý neşiri bu modeliň dürli görnüşlerine, şol sanda 1250 at güýjüne eýe bolan iň güýçli ZR1X super-gibridine esaslanýar.
Corvette Stars&Steel modelinden jemi 250 sanysy öndüriler. Awtoulagyň kuzowy gara ýa-da ak reňkde bolup, ol ABŞ-nyň baýdagyny ýatladýan ýyldyzlar we zolaklar bilen bezelendir. Salonyň içinde ulagyň seriýadaky tertip sany ýazylan ýörite tagtajyk (tabliçka) ýerleşdirilýär. Şeýle hem içki bezegde, howpsuzlyk kemerlerinde we hereketlendirijiniň gapagynda gyzyl reňkli detallar aýdyň görünýär.
Müşderiler teker diskleriniň üç görnüşini, şol sanda ýeňil we durnukly uglerod süýümli (karbon) wariantyny saýlap bilerler.
Seriýada ýeke-täk boljak 1250 at güýçli ZR1X wersiýasyna aýratyn üns berilýär. Bu super-gibrid 0-dan 100 km/sag tizlige bary-ýogy 2,8 sekuntda ýetýär. Ol ýanwar aýynda geçiriljek meşhur Barrett-Jackson auksionynda satuwa çykarylar.
Corvette-iň ýubileý seriýasynyň önümçiligi 2026-njy ýylda başlanar. Bu ýörite kolleksiýa diňe bir Corvette däl, eýsem Silverado LD, Silverado EV, Silverado HD we Colorado ýaly pikap modellerini hem öz içine alar. Deslapky maglumatlara görä, beýleki modelleriň sany çäklendirilmez: kompaniýa olary islege görä öndürmegi meýilleşdirýär.
